مقالات > خالد حمزة يكتب: تقوله تور .. يقولك احلبوه

17 يوليو 2014 3:07 م
-

خالد حمزة يكتب: تقوله تور  .. يقولك احلبوه

قال الرئيس عبد الفتاح السيسى انه سيتبرع بنص راتبه وبنص ثروته لصندوق دعم مصر اوأ يان كان الاسم ولم يكتف الرجل بذلك بل اخذ نفسه وراح لاحد البنوك وسلم تبرعه وصورته الكاميرات وهو يحث موظفى البنك ويسالهم هل تبرعتم ام لا
وحذا حذوه رئيس الوزرا الباشمهندس ابراهيم محلب واخذ بعضه وذهب لبنك اخر بعد الريس وتم تصويره وهو يقدم تبرعه لمصر
وقبلهما قرر رجل الاعمال فلان ورجل الصناعة ترتان
وبعض الاخوة العرب
والمغتربين المصريين
التبرع لمصر وحتى كتابة تلك السطور قد يتجاوز الرقم المقدر للتبرعات بنحو نص مليار جنيه مصرى
ولكن المطلوب حسب تقديرات الجهات العليا لايجب ان يقل عن ال50 مليار جنيه اى والله
هما اللى قالوا ومش انا
بس ازاى ياعم
وانت كل يوم طالع نازل تاخد من الشعب
ايشى مرة ضرايب
وايشى مرة خفض لدعم الوقود بكل أنواعه
وايشى مرة رفع لشرايح الكهربا
وايشى وايشى
وفين يا شعب يوجعك
حرام عليكم الضرب فى الميت اقصد فى الشعب
حرام حرام
وبدلا من سياسة الحلب
وبدلا من سياسة من ديله وافتله
ولبس ده لطاقية ده
جربوا مرة تشتغلوا صح
والصح مش انك تاخد من الفقير كالعادة اوحتى انك تاخد من الغنى اللى بيدفع ضرايبه والذى منه وماشى زى الالف مع الحكومة
جربوا تاخدوا من الحرامية اللى سرقوا الشعب
جربوا تدوروا بنية خالصة عن الاموال المنهوبة والمحطوطة بحنية فى لندن وباريس والمحروسة سويسرا
جربوا تشتغلوا ل5 سنين جايين
وبلاش ضحك على الدقون
ونغمة شد الحزام
والخروج من عنق الزجاجة
جربوا تشتغلوا صح فى سينا وتوشكى والصعيد
جربوا تستغلوا ثرواتنا الطبيعية بحكمة وبربح حقيقى يروح للشعب فى النهاية
ومش لشركات حراميين دوليين
ولا نصابين محليين
جربوا تحترموا عقلية وصبر الشعب
جربوا ولو مرة تكونوا .....
مصريين بجد


التعليقات